རྒྱལ་ཡོངས་ཡིག་ཆའི་གཏན་མཛོད་ཁང་།

རྒྱལ་ཡོངས་ཡིག་ཆའི་གཏན་མཛོད་ཁང་གི་འགན་ཁུར་འདི་ སྔོན་མའི་ཡིག་ཆ་རྙིངམ་ཚུ་གིས་ གཙོས་པའི་ད་ལྟོ་གི་ཡིག་རིགས་ཚུ་དང་ མ་འོངས་པའི་ཡིག་ཆ་ཚུ་ག་ར་ ཤུལ་མའི་བུ་བརྒྱུད་ཚུ་གི་མཐའ་དོན་ལུ་བསྡུ་གསོག་འབད་དེ་ མི་ཉམས་བདག་བཛིན་འཐབ་སྟེ་བཞག་ནི་དང་ རྒྱུན་སྐྱོང་འབད་ནི་འདི་ཨིན༎

གནམ་ལོ་ ༢༠༠༠ དབྱིན་ཟླ་ ༦ པའི་ནང་ལུ་ ཌེན་མརྐ་དང་འབྲུག་རྒྱལ་གཞུང་གཉིས་ཀྱི་བར་ན་ རྒྱལ་ཡོངས་ཡིག་ཆའི་མཛོད་ཁང་ངམ་ གཏན་མཛོད་ཁང་གི་དན་ལུ་ སྒྲིང་ཁྱིམ་ཐོག་ཚད་གཉིས་འབད་མི་དང་ དེའི་ནང་ན་མེ་རྐྱེན་གྱི་ཉེན་བརྡ་བྱིན་ནིའི་འཕྲུལ་ཆས་ བསིལ་དྲོད་དང་རློན་གཤེར་ཚད་འཛིན་འབད་ནིའི་ དེང་སང་གི་འཕྲུལ་ཆས་དང་ལྡན་པའི་ སྒྲིང་ཁྱིམ་བརྐྱབ་ནི་འབད་ ཆིངས་ཡིག་གུར་མཚན་རྟགས་བཀོད་གནངམ་བཞིན་དུ་ གནམ་ལོ་ ༢༠༠༤ ལོ་ལུ་བསྒྲུབས་ཡོདཔ་ཨིན༎

རྒྱལ་ཡོངས་དྲན་རྟེན་ཁང་།

ཡིག་ཆའི་མཛོད་ཁང་ནང་ལུ་ག་ནི་བ་ཁག་ཆེ་བའི་ སྔོན་དང་ཕུགས་ཀྱི་ཡིག་ཆ་དང་ གཏང་ཡིག་རྙིངམ་ཚུ་ གྱངས་ཁ་བརྐྱབ་པ་ཅིན་ སྟོང་ཕྲག་བདུན་ལས་ལྷགཔ་སྦེ་ཡོཔ་པའི་ དཔར་དང་པར་ཡིག་གི་རིགས་ཚུ་ག་ར་ ཆུང་བཟོ་འཕྲུལ་ཆ་ (Microfilm) གི་ཐོག་ལུ་བཟོ་སྟེ་ཡོདཔ་མ་ཚད་ ཤིན་ཏུ་དཀོན་དྲགས་པའི་དཔེ་ཆ་ཚུ་དང་ པར་མའི་ཕྱག་དཔེ་ཚུ་བསྡུ་ལེན་འབད་དེ་ཡོད་མི་ ག་ར་ཉེན་སྲུང་འབད་དེ་ཡོདཔ་ལས་ མ་འོངས་པ་ལུ་ ད་ལྟོ་ང་བཅས་ཚུ་གིས་མཁོ་བསྒྲུབས་འབད་དེ་ཡོད་པའི་ ཡིག་ཆ་དེ་ཚུ་གིས་ རྒྱལ་ཡོངས་དྲན་རྟེན་ཁང་གཅིག་གཞི་བཙུག་འབད་ནི་ཨིནམ་ལས་ དེའི་གཞི་རྟེན་བཟུམ་ཅིག་ལུ་དམིགས་ཏེ་ དཀོན་དྲགས་ཅན་གྱི་ཕྱག་དཔེ་དང་ ཡིག་རིགས་བསྡུ་གསོག་འབདཝ་ཨིན༎

རྒྱལ་ཡོངས་ཡིག་ཆའི་མཛོད་ཀྱིས་ ད་ལྟོ་ཡོད་པའི་མཛོད་ཁང་འདི་ རྒྱལ་ཡོངས་དྲན་རྟེན་ཁང་འབད་བཟོ་ནི་གི་དོན་ལས་ རྒྱལ་ཁབ་ནང་ལུ་ཡོད་མི་དང་ རྒྱལ་ཁབ་ཕྱི་ཁ་ལུ་བཞུགས་མི་ གཙུག་སྡེ་དང་སྒེར་པ་སོ་སོ་ཚུ་ལུ་ གསོལ་འདེབས་གཅིག་ཞུ་བ་ཅིན་ ང་བཅས་དཔལ་ལྡན་འབྲུག་པའི་རྒྱལ་ཁབ་དང་ འབྲེལ་བའི་གལ་གནད་ཅན་གྱི་ཡིག་ཆའི་རིགས་དང་ ཡིག་ཆ་མིན་པའི་རིགས་ག་ཅི་བཟུམ་སྦེ་རུང་ མ་འོངས་པའི་མཐའ་དོན་ལུ་ དེའི་འདྲ་དཔར་ཡང་ན་ འདྲ་བཤུས་གཅིག་གཉིས་རེ་ཞལ་འདེབས་སྦེ་ གནང་བཀྲིན་བསྐྱང་ཟེར་ཞུ་ནི་ཨིན༎

ཆུང་བཟོ་འཕྲུལ་ཆའི་ (Microfilm) མཐུན་རྐྱེན་དང་ཞབས་ཏོག

འབྲུག་རྒྱལ་ཡོངས་དཔེ་མཛོད་ཀྱིས་ འབྲུག་རྒྱལ་ཁབ་ཀྱི་ནང་འཁོད་ལུ་ཡོད་མི་ གཙུག་སྡེ་དང་སྒེར་པའི་ནང་ལུ་ ཤིན་ཏུ་དཀོན་པའི་ཕྱག་དཔེའི་རིགས་ མངའ་སྟེ་ཡོད་མི་ཚུ་ལུ་ ད་ལས་ཕར་ རིན་མེད་སྟོང་པར་ ཆུང་བཟོ་འཕྲུལ་ཆ་གིས་པར་བཏབ་ནིའི་ཞབས་ཏོག་ (Microfilming Facility) བྱིན་ནི་ཨིན། དེ་བཟུམ་མའི་ཞབས་ཏོག་བྱིན་མི་དེ་ཡང་ ཕྱག་དཔེའི་མ་དཔེ་ཚུ་ཉམས་སོང་རུང་ དེའི་འདྲ་བཤུས་དེ་ཚུ་ཡུན་བརྟན་འབད་བཞག་ནིའི་ནུས་པ་ཡོདཔ་ལས་བརྟེན་ མི་དམངས་ག་ར་ལུ་ སེམས་ཤུགས་སྐྱེད་བཅུག་ནིའི་དོན་ལས་ དེ་བཟུམ་མའི་ཕྱག་དཔེ་ཡོད་པ་ཅིན་ དཔེ་མཛོད་ནང་འབག་འོང་སྟེ་པར་བཏབ་པ་ཅིན་ བཀྲིན་ལེགས་སོའི་བརྡ་མཚོན་ལུ་ མ་དཔེ་དཔེ་ཆ་དེ་དང་སྦྲགས་ཏེ་ འདྲ་བཤུས་གཅིག་ཡང་བྱིན་ནི་དང་ དེ་ལས་དེའི་འདྲ་དཔར་གཅིག་དཔེ་མཛོད་ནང་ ཉེན་སྲུང་དང་བདག་འཛིན་འཐབ་སྟེ་བཞག་ནི་ཨིན༎

ཉེན་སྲུང་དང་ མི་ཉམས་རྒྱུན་སྐྱོང་།

ཡིག་ཆའི་མཛོད་ཁང་འདི་ནང་ལུ་ མང་ཤོས་ར་ ཤོ་གུ་དང་འབྲེལ་བ་ཡོད་མི་ཡིག་ཆ་དང་ ཕྱག་དཔ། དེ་ལས་དཔེ་དེབ་ཀྱི་རིགས་ཙང་ཙ་རང་ཨིནམ་ལས་ དེ་ཚུ་ག་ར་ རྫས་སྦྱོར་སྣ་ཚོགས་བླུགས་ཏེ་ པར་བསྐྲུན་འབད་འབདཝ་ཨིན། དེ་འབདཝ་ལས་བརྟེན་ རྫས་སྦྱོར་དེ་ཚུ་གིས་ ཤོ་གུ་ཚུ་ཕྲལ་མགྱོགས་འབད་མེདཔ་བཏངམ་ལས་ ཡིག་ཆ་དེ་ཚུ་ཉམས་སྲུང་དང་རྒྱུན་སྐྱོང་གི་དོན་ལུ་ རྫས་སྦྱོར་གྱི་གནོད་རྐྱེན་བཀག་ཐབས་དང་ གསུང་རབ་རྙིངམ་ཉམས་འགྱོ་ནིའི་ཉེན་ཁག་ཡོད་མི་ཚུ་ཡང་ མ་འོངས་ཡུན་བརྟན་བཞག་ཐབས་ལུ་དང་ མི་ཉམས་རྒྱུན་སྐྱོང་འཐབ་ནིའི་དོན་ལུ་ བརྩོན་ཤུགས་སྐྱེདཔ་ཨིན༎

འབྲུག་རྒྱལ་ཡོངས་དཔེ་མཛོད་ཀྱི་བཅོལ་འཇོག་བཅའ་ཁྲིམས།

གནམ་ལོ་ ༡༩༩༩ ལོའི་ རྒྱལ་ཡོངས་ཚོགས་འདུ་ཆེན་མོ་ཚོགས་ཐེངས་ ༧༧ པའི་ནང་ ཡིག་ཐོག་ལུ་བཀོད་ཡོད་པའི་ འབྲུག་རྒྱལ་ཁབ་ཀྱི་སྔོན་བརྒྱུད་ཀྱི་ཡིག་ཆ་དང་ མཛད་ཤུལ་ཚུ་ བསྡུ་ལེན་འབད་དེ་བདག་འཛིན་འཐབ་ནི་དང་ འཛིན་སྐྱོང་འབད་ནི་གི་བཅའ་ཁྲིམས་འདི་ ཆ་འཇོག་གནངམ་ལས་ཚུར་ བཅའ་ཁྲིམས་དེ་དང་འཁྲིལ་ཏེ་ ཡིག་ཆས་རིགས་ཀྱི་འདྲ་དཔར་ཚུ་ཡང་ ཡིག་ཆས་མཛོད་ཁང་ནང་གསོག་འཇོག་འབད་བཞགཔ་ཨིན༎

མ་འོངས་འཆར་གཞི།

ལོ་ལྔའི་འཆར་གཞི་ ཐེངས་ ༡༠ པའི་ནང་ལུ་ རྒྱལ་ཡོངས་ཡིག་ཆས་མཛོད་ཁང་གིས་ རྒྱལ་ཁབ་ནང་འཁོད་ནང་ གལ་ཅན་གྱི་གསུང་རབ་དང་ཡིག་ཆ་ཚུ་གི་ བཟོ་རྣམ་དང་ཚད་གཞི། དེ་ལས་ ས་གནས་ག་སྟེ་ལུ་འོདཔ་ཨིན་ནའི་གནས་ཚུལ་ཚུ་ ཐོ་བཀོད་འབད་དེ་རྒྱུན་སྐྱོང་འཐབ་ནི་ཨིན། གལ་སྲིད་ གསུང་རབ་དེ་ཚུ་ཐོ་བཀོད་ནང་མེད་པ་ཅིན་ ཕྱག་དཔེ་མངའ་སྟེ་ཡེད་པའི་ སྦྱིན་བདག་ཚུ་ལུ་ དེ་མི་ཉམས་བདག་འཛིན་ལེགས་ཤོམ་འབད་ཐབས་ཀྱི་དོན་ལུ་ ཐོ་བཀོད་འབད་ནི་ལུ་སྤྲོ་བ་བསྐྱེད་བཅུག་ནི་དང་ སྔར་སྲོལ་ལམ་ལུགས་དང་འབྲེལ་བའི་ རྒྱལ་རབས་ཅན་གྱི་ཁ་རྒྱུན་ཚུ་ཡང་ བརྟག་ཞིབ་ཀྱི་ཐོག་ལས་ མཐོང་ཐོས་འཕྲུལ་ཆས་ཀྱིས་ འདྲ་བཟུང་འབད་དེ་རྒྱལ་ཡོངས་ཀྱི་དོན་ལུ་ རྒྱུན་སྐྱོང་འཐབ་ནིའི་འཆར་གཞི་ཡོདཔ་ཨིན༎

གདོང་ཤོག | ལྟག་ལུ་ | འབྲེལ་མཐུད་ | འབྲེལ་བ་འཐབ་ས་