འབྲུག་རྒྱལ་ཡོངས་དཔེ་མཛོད་ཀྱི་འབྱུང་རབས།

བླམ་པདྨ་ཚེ་དབང་ ཡོངས་གྲགས་ལུ་སློབ་དཔོན་པདྨ་ལ་ཟེར་ཞུ་མི་འདི་ མདོ་ཆེན་གཉིས་པ་འབད་ སྤྱི་ལོ་ ༡༩༧༣ ལོ་ལུ་ བསྐོ་བཞག་གནང་ཡོདཔ་ཨིན། སློབ་དཔོན་པདྨ་ལ་མཆོག་ བུམ་ཐང་རྫོང་ཁག་ ཆུ་སྨད་ལུ་སྐུ་འཁྲུངས་ཏེ་ སྐུ་ན་ཕྲ་བའི་སྐབས་ལས་འབྲི་ཀློག་གི་ཡོན་ཏན་སྦྱང་སྟེ་ ཤུལ་ལས་ ཁོ་རའི་ཕམ་གཉིས་ཀྱིས་ རྡོར་རིང་སྤྲུལ་སྐུ་མཆོག་གིས་བཅགས་གནང་པའི་ ཉི་མ་ལུང་བཤད་གྲྭ་ནང་ལུ་འཛུལ་ཞུགས་འབད་དེ་ རིག་གཞུང་གི་སྐོར་ཚུ་སྦྱང་བརྩོན་མཛད་ནུག།

དེ་གིས་མ་ཚད་དཔར་ ཡོངས་གྲགས་ཅན་གྱི་བླམ་དང་མཁན་པོ་ ངག་དབང་ཡོན་ཏན་རྒྱ་མཚོ། འཕྲང་མགོ་རྟོགས་ལྡན། སྒྲུབ་བརྒྱུད་རིན་པོ་ཆེ། ཀཿཐོག་རིན་པོ་ཆེ་ ངག་དབང་ཕྲིན་ལས། མཁན་ཆེན་ ཐུབ་བསྟན་ཀུན་དགའ་རྒྱ་མཚོ། ཁུ་ནུ་བླ་མ་ བསྟན་འཛིན་རྒྱལ་མཚན། དེ་ལས་དིལ་མགོ་མཁྱེན་བརྩེ་རིན་པོ་ཆེ་དང་ བདུད་འཇོམས་རིན་པོ་ཆེ་ འཇིགས་བྲལ་ཡེ་ཤེས་རྡོ་རྗེ་དང་གཞན་ཡང་ རྙིང་མའི་བླ་མ་ཚུ་བསྟེན་ཏེ་ ཐོས་བསམ་་མཛད་གནང་ནུག།

སྤྱི་ལོ་ ༡༩༦༡ ལོ་ལུ་ འབྲུག་གཞུང་གིས་ གསར་བཙུགས་འབད་ཡོད་པའི་ སེམས་རྟོགས་ཁ་རིག་གཞུང་སློབ་གྲྭའི་སློབ་དཔོན་འབད་བསྐོས་གནང་ནུག སྤྱི་ལོ་ ༡༩༦༧ ལོ་ལུ་ ཤེས་རིག་ལས་ཁུངས་ནང་རྩོམ་སྒྲིག་པ་འབད་གནས་སོར་བཏང་སྟེ་ སློབ་རིམ་ བཞི་པ་ལས་བཅུ་པ་ཚུན་གྱི་ གནས་ཚད་ཅན་གྱི་རྫོང་ཁའི་རྩ་གཞུང་གསརཔ་རྩོམ་བསྒྲིགས་མཛད་གནང་ནུག།

སྤྱི་ལོ་ ༡༩༧༠ ལོ་ལུ་ དབང་ཕྱུག་ཤེས་ཡོན་སློབ་ཁང་ནང་ལུ་ གནས་སོར་བཏངམ་དང་འབྲེལ་ཏེ་ རྫོང་ཁའི་ནང་འབྲི་ནིའི་ལམ་ལུགས་བཟོ་དགོ་པའི་འགན་དབང་ཡང་ཐོབ་ནུག དེ་ལས་ སྤྱི་ལོ་ ༡༩༧༢ ལོ་ལུ་ མི་དབང་འབྲུག་རྒྱལ་གསུམ་པ་ཞིང་ལུ་ཕེབས་ཞིནམ་ལས་ སྤུར་སྦྱངས་ཀྱི་སྤུར་ཐལ་མ་གཤགས་ཚུན་ཚོད་ལུ་འགོ་འདྲེན་མཛད་ཡོདཔ་མ་ཚད་ སློབ་དཔོན་མཆོག་གིས་ རྒྱལ་ཡོངས་ཚོགས་ཁང་ཆེན་མོ་གིས་ རྫོང་ཁའི་སྐད་ཡིག་ལུ་ ལོ་གཉིས་དགག་པ་མཛད་པའི་དགག་ལན་ཚུ་བྲིས་ཏེ་ཚོགས་ཁང་ནང་བཀྲམ་སྤེལ་མཛདཔ་ལས་ལན་ག་ནི་ཡང་མེད་དཔར་གྱུར་བའི་ཕྱག་ལཱ་ བཟང་པོའི་མཛད་རྣམ་ལུ་དམིགས་ཏེ་ མི་དབང་འབྲུག་རྒྱལ་བཞི་པའི་ཞབས་ལས་ གཟེངས་བསྟོད་གསེར་གྱི་རྟགས་མ་ཡང་བཞེས་ནུག།

སྤྱི་ལོ་ ༡༩༧༣ ལུ་ རྒྱལ་ཡོངས་དཔེ་མཛོད་ལུ་ གནས་སོར་བཏང་སྟེ་དེ་ནང་ཕེབས་ཞིནམ་ལས་ ནང་པའི་ཆོས་དང་འབྲེལ་བའི་ ལས་རྒྱུ་འབྲས་ལུ་ཡིད་ཆེས་བསྐྱེད་པའི་དཔེ་དེབ་ ‘འཁོར་འདས་ལམ་གསུམ’ ཟེར་མི་འདི་མཛད་གནང་ཡོདཔ་མ་ཚད་ མི་དབང་ཨ་ཞེ་ བསོད་ནམས་ཆོས་སྒྲོན་དབང་ཕྱུག་མཆོག་གིས་ ཞིབ་འཚོལ་མཐིལ་ཕྱིན་ཐོག་འབྲུག་གི་རྒྱལ་རབས་གཅིག་ རྩོམ་སྒྲིག་གནང་དགོ་པའི་བཀའ་རྒྱ་ཕེབས་བཞིན་དུ་ ‘འབྲུག་གསལ་བའི་མེ་ལོང་’ ཟེར་བའི་དཔེ་དེབ་གཅིག་མཛད་གནང་ནུག།

སློབ་དཔོན་པདྨ་ལ་མཆོག་གིས་ ཞི་བའི་གོ་གནས་མང་རབས་ཅིག་བཞེས་པའི་མཐར་ སྤྱི་ལོ་ ༡༩༩༣ ལོ་ལུ་དགོངསམ་ཞུ་སྟེ་ ཉི་མ་ལུང་གྲྭ་ཚང་གི་བླམ་མཛད་དེ་བཞུགསཔ་མ་ཚད་ སྤྱི་ལོ་ ༡༩༩༩ ལོར་ མི་དབང་འབྲུག་རྒྱལ་བཞི་པ་གསེར་ཁྲི་གུར་ཕེབས་ཏེ་ མི་ལོ་ཉེར་ལྔ་འཁོར་བའི་དུས་སྟོན་བརྩི་སྲུང་གི་སྐབས་ འབྲུག་ཐུགས་སྲས་ཀྱི་རྟགས་མ་ཡང་བཞེས་ནུག།

སྤྱི་ལོ་ ༡༩༩༣ ཟླཝ་ ༩ པའི་ནང་ལུ་ གྲྭ་ཚང་ལྷན་ཚོགས་ནང་ཕྱག་ལཱ་མཛད་མི་ དྲགོས་སངས་རྒྱས་དབང་ཕྱུག་མཆོག་ རྒྱལ་ཡོངས་དཔེ་མཛོད་ནང་མདོ་ཆེན་འབད་ བསྐོ་བཞག་གནང་སྟེ་ དྲགོས་མཆོག་གིས་ དཔེ་མཛོད་ནང་ དེང་སང་གི་མཁོ་གལ་ཆེ་བའི་འགྱུར་བ་དང་བསྟུན་ དཔེ་དེབ་ལྷག་མི་ཚུ་ལུ་ཕྱི་རྒྱལ་གྱི་དཔེ་དེབ་ཚུ་ཡང་ཐོབ་ཚུགསཔ་བཟོ་ཡོདཔ་མ་ཚད་ ཞིབ་འཚོལ་གྱི་དོན་ལུ་དཔེ་དེབ་ཚུ་ཡང་གསོག་འཇོག་འབད་དགོ་པའི་སྒོ་འབྱེད་མཛད་ནུག།

སྤྱི་ལོ་ ༡༩༩༦ ལོར་ དྲགོས་མཆོག་ དཔེ་མཛོད་མདོ་ཆེན་མཛད་བཞུགས་པའི་སྐབས་ ཌེ་ནེ་ཌའི་རྒྱབ་སྐྱོར་མ་དངུལ་གྱི་ཐོག་ལས་ ཌེན་མརྐ་རྒྱལ་གཞུང་དཔེ་མཛོད་དང་ འབྲུག་རྒྱལ་ཡོངས་དཔེ་མཛོད་གཉིས་ཀྱི་ཡུན་བརྟན་ མཉམ་འབྲེལ་གྱི་ལས་འགུལ་གཅིག་ཡང་གཞི་བཙུགས་གནང་སྟེ་ ལོ་ངོ་དྲུག་མདོ་ཆེན་འབད་ཕྱག་ཕྱིད་ཞུས་པའི་མཐར་ སྲོལ་འཛིན་ལས་ཁུངས་ཀྱི་དྲུང་ཆེན་གྱི་གོ་གནས་བཞེས་ནུག།